Qırım Cumhuriyeti ve Sevastopol şeeri musulmanları diniy idaresinde “Alem” et tükânları ağınıñ rehberi Ayder Haybullayevğa elâllıq sertifikatınıñ devam ettirilmesi aqqında şeadetname berildi. Tükânlarda müşteriler büyük baş ve kiçik baş ayvanlarınıñ etini, quş etini, kolbasalar ve çeşit delikateslerni, et konservalarnı, yarı azır etli aşlarnı satın ala bileler. İnsanlarnıñ eyiligi oğrunda eyi çalışmalar tilep, vesiqanı Qırım Müftisiniñ muavini Raim Ğafarov taqdim etti.”Qırımda elâl sanayısınıñ inkişaf etkeni quvandıra.Qırımda yaşağan bütün milletlerniñ vekilleri elâlnı – keyfiyetniñ köstergiçi sayalar.Bu al quvandıra, öyle de olmaq kerek, elâl meselesi din çerçivesinde olmamalı, onıñ kontseptsiyası daa globaldir”, – dep, qayd etti Raim Ğafarov.
İhtar: Elâllıq sertifikatını almağa istegen iş adamları QMDİ “Elâl” sertifikatsiyası merkeziniñ başlığı Remzi Qurtdedege nevbetteki telefon boyunca muracaat ete bile: +79780741847, ya da el.adres: halal@qmdi.ru
Qırım MDİ matbuat hızmeti