Aqmescitte bayram müitinde qadınlar içün cumhuriy qadınlar hayriye iftarı ötkerildi. İftarnı Qırım Cumhuriyeti ve Sevastopol şeeri musulmanları diniy idaresi erkânında çalışqan “Alem-i nisvan” islâmiy medeniy maarif qadınlar merkezi teşkil etti.
İftar Qırımnıñ farqlı bölgelerinde kelgen 200 qadınnı bir arada topladı. Cumhuriy qadın iftarınıñ esas ğayesi hayriye oldı. İftar aqşamı çersivesinde “Merhametlik lâlesi” aktsiyasına bir destek olaraq yarmalıq teşkil etildi. Onıñ maqsadı – ağır hasta balalarnıñ qorantalarına paralar toplamaq ve bala hospisini qurmaqtır.
Yarmalıqta balalar ve büyüklerniñ ellerinen yapılğan işleri, aktsiyanıñ timsali olğan lâleler taqdim etilip satıldı. Bundan da ğayrı, hayriye aktsiyasında Qırımnıñ dekorativ ameliy sanat ustaları da iştirak ettiler.
Aqşamnıñ esas eki mevzusı olaraq analıq ve zemaneviy dünyada musulman qadınınıñ rolü mevzuları açıqlandı.
“Alem-i nisvan” merkeziniñ rehberi Zenife Ablayeva Rusiye Federatsiyası Prezidentiniñ fermanına esasen Aile yılı olaraq ilân etilgen bu senede çoq balalı analarnı belgilep, olarnı Qırım Müftisi hacı Emirali Ablayev adından mukâfatlandırmaq qararı alınğanını bildirdi.
“Bugün bizler içün quvançlı bir kündir. Bu hayriye aqşamında toplanğan bütün güzel qadınlarımıznı selâmlamaqtan pek memnunım. Qadın olmaq, em de ana olmaq ne qadar qıyın olğanını bizlerden yahşı uim bilir? Em qıyındır, em de büyük quvançtır. Bizler, iftarımıznıñ teşkilâtçıları olaraq, qadınnıñ zemaneviy cemiyetteki emiyetli rolüni qayd etmege, oña destek köstermege, ögrenmege, inkişaf etmege imkân bermek isteymiz. “Alem-i nisvan” merkeziniñ qapısı, dini ve milletine baqmadan, er kes içün açıq. Biz birlik, eyilik ve yardımlaşuv taraftarımız”, – dedi Zenife Ablayeva.
Bundan soñ, çoq balalı analar arasında ümrege barmaq imkânı içün qura çekildi. Qırım Müftisi Müftiligimizniñ hac turoperatorı “AVN-tur” arqalı çoq balalı bir anağa ümrege barıp kelmek imkânını teşkil etti.
İftarnıñ musafirleri içün maarif medeniy programması azırlanıldı, “Alem-i nisvan” merkeziniñ faaliyetini açıqlağan videolevhalar numayış etildi.
İftarnıñ teşkilâtçıları ve sponsorlarından bütün qadın-qızlarğa qıymetli bahşışlar taqdim etildi.
Nevbetteki yayınlarımızda iftarnı tafsilâtlıca aks etken video- ve fotoreportajlarnı seyir ete bilirsiñiz.
Qırım MDİ matbuat hızmeti