Qırım Cumhuriyeti ve Sevastopol şeeri musulmanları diniy idaresiniñ “Altın nesil” musulman internet klubı körüşüvlerini ğayrıdan başladı. Tedbir “Faydalı ilim” maarif leyhası çerçivesinde olıp keçti.
Klubnıñ nevbetteki taplaşuvında iştirakçiler “Halq, sana ve seyirciler ögünde çıqış yapmaq qorqusı” mevzusını muzakere ettiler.
Ders devamında telâffuz ve açılış inkişafı içün yapılğan meşğuliyetler vastasınen krılbnıñ yaş iştirakçileri halq ögünde qorqunıñ peyda oluvı, qoqu ile eyecan arasındaki bağnıñ ne olğanı, halq ögünde çıqıştan aldın olğan qorqu ve eyecannı nasıl yeñmeli kiib meselelerni ögrendi.
Klubnıñ iştirakçileri özleri olarnı meraqlandırğan mevzularnı belgiley, qonuşmacılarğa berilecek suallerni azırlay ve öz malümatlarınen paylaşalar. Nevbetteki toplaşuvnıñ aprel ayında, mubarek Ramazan ayından evel keçirilmesi planlaştırıla.
Hatırlatamız ki, “Altın nesil” musulman internet klubı yaş musulmanlar içün teşkil etilgen. Klubnıñ maqsadı – 10-16 yaştaki gençler içün alternativ musulman qonuşuv müitini yaratmaq, hususan, boş vaqıtnı maarif ve qırımtatar musulmannıñ şahsiyetini inkişaf ettirmege yönelik cemaatçe yapılğan faaliyetnen toldırıp, degerlendirmektir.
Klubğa yazılmağa istegenler nevbetteki telefon vastası ile muracaat ete bileler: +79788639566.
Qırım MDİ matbuat hızmeti
