Qırım musulmanları diniy idaresiniñ “Faydalı ilim” oqutuv-maarif merkezinde qadınlar içün “İslâmda qadınnıñ emiyeti ve qıymeti” mevzusında seminar olıp keçti. Tedbir fevral 1 künü qayd etilgen Bütündünya hicap kününe bağışlandı. Seminarda 50-den ziyade kişi iştirak etti. Olarnıñ ögünde oqutuv merkeziniñ ocaları çıqışta bulundı.
İslâm temelleri ocası Seyare Memetova qadınnıñ qıymeti, Allah qadınnı güzel yaratqanınıñ sebebi, onıñ Allahqa nisbeten vazifeleri aqqında tarif etti.
Din ocası Leylâ Ümerova tesettürniñ ne olğanını, maiyeti ve añlamını, musulman qadınnıñ kiyimi nasıl olmaq kerekligini, hicapnıñ qıymetini ve savabını añlattı.
Zaynab Aliyeva qırımtatar milliy urbanı taqdim etken çıqışta bulundı. O, milliy kiyimniñ tarihını ve farqlı devirlerde onıñ nasıl deñişkenini añlatqan. Tedbirniñ soñunda seminar iştirakçilerine ediyeler berildi.
QMDİ matbuat hızmeti
