Aqmescitte V Bütünqırım “Hayrunnisa” intellektual İslâm yarışınıñ finalı olıp keçti. Tedbir Seit Settar diniy külliyesinde ötkerildi. Yarışta Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” islâmmy kurslarnıñ talebeleri iştirak etti.
Leyha reberi Zeyneb Bairova çıqışında qayd etti ki, yarışnıñ esas maqsadı – İslâmnı ögrenmege davet etmektir. Bundan da ğayrı, o, tedbirni teşkil etmege ve keçirmege yardım etken er keske teşekkür bildirdi.
Qırımnıñ farqlı taraflarından kelgen 12 iştirakçi bilgilerini numayış etti. Yarış üç qısımdan ibaret edi. Hanımlar aqide ve fıqıh saalarında bilgilerini sıñadılar, peyğamberlerniñ ömüri aqqında suallerge cevap berdiler. Bundan da ğayrı, yarışqa Quran oquvı da kirdi.
Yarışçılarnıñ bilgilerine jüri azaları qıymet kesti, jüri terkibine “Faydalı ilim” ocaları kirdi. Qazanğan baalarğa köre, ğalipler belgilendi. Böylece, birinci yerni Aqmescitteki Oquv merkezinde keçirilgen diniy kurslarnıñ talebesi Venera İbragimova qazandı. Ekinci yerni Şükriye Abdurahmanova, üçünci yerni ise, Arzı Aliyeva aldılar. Yarış ğalipleri ve bütün iştirakçiler teşkilâtçılar ve sponsorlardan qıymetli ediyeler qazandı.
Musafirler de diqqatsız qalmadı. Yarış devamında olar arasında parikmaher-stilist Yekaterina Korobovağa barmaq içün 10 sertifikat, kosmetolog, ekim Beyanağa barmaq içün sertifikat, bundan da ğayrı, “Anfal Veil” qadınlar urbaları tükânı ve “Sapfir Ceverli” ilvanlar tükânına ziyaret sertifikatları tarqatıldı.
Yarış basamaqları arasında musafirler ögünde “Emanet” bala studiyasınıñ iştirakçileri çıqışta bulundı. Bütünqırım “Hayrunnisa” İslâm yarışı er sene Qırım Müftisi hacı Emirali Ablayeniñ destegi ile keçirile.
QMDİ matbuat hızmeti
