2018 senesi sentâbr 10 künü Aqmescitte Qırım Müftisi hacı Emirali Ablayevniñ yolbaşçılığında Qırım ve Sevastopol şeeri müsulmanları Diniy İdaresi Yuqarı Şurasınıñ toplaşuvı olıp keçti. Muşavere çerçivesinde Şura azaları regional toplaşuvlarnıñ neticelerini muzakere ettiler. Mında yerli din cemiyetlerinden Qırım müsulmanları Qurultayına namzetler seçilip alındı. Bundan ğayrı, VI Qırım müsulmanları Qurultayınıñ teşkiliy sualleri muzakere etildi. Qurultayda Qırımnıñ er bir regionından 300-den ziyade namzet iştirak etecek. Hatırlatamız, esabat-saylav Qurultayı 2018 senesi oktâbrniñ 27-de Aqmescitte keçirilecek. Şuranıñ torplaşuvı devamında Qurban bayramında keçirilgen tedbirlerniñ neticeleri – hususan, dualar, qurban çalınuvı, muhtac olğan insanlarğa qurban etiniñ dağıtıluvı – çıqarıldı… Umumen, Diniy İdare, Qırım boyunca 43-ten ziyade bala bayramını ve farqlı tedbirlerni teşkil etti. Mezkür tedbirlerde ölgenlerniñ hatırası añıldı ve musafirlerge çeşit lezzetli yemekler ikram etildi.
QMDİ matbuat hızmeti
