Aqmescitte sürgünlikni yaşağanlarnıñ hatıralarını bir arağa toplağan “Qalpte iman ile” kitabınıñ taqdimi olıp keçti. Cıyıntıqnı Zenife Ablayeva ve Gülnara İlyasova işlep, tertip ettiler.
Eser Qırım Cumhuriyeti ve Sevastopol şeeri musulmanları diniy idaresi tarafından neşir etildi.
Taqdim merasimi Qırımtatar akademik muzıkalı drama teatrinde olıp keçti.
Merasimniñ başında kitap qahramanlarınıñ sürgünlikte keçirgen qara künlerini tarif etkeni “Hatıralar” adlı vesiqalı film kösterildi.
Toplanğanlar ögünde Qırım Müftisi çıqışta bulunıp, er kesni selâmladı. O, daa bir kere millet birliginiñ müimligini qayd etti.
“Birlik, birdemlik, destek, yardımlaşma, göñül hassasiyeti, Vatanğa qaytqan soñ, qırımtatarlarğa birinci yılları pek yardım etti. Hatırlañız, biz qıyın alda olğan bilmegenimiz adamlarğa yardım ete edik, aynı eyecan ile, birdem olıp, öz aqlarımız içün küreşe edik. Bugün de aynı şekilde birlik olmasaq, bir-birimizge diqqat etmesek, yahşı bir şey olmaz. Halqnıñ temeli – dinimiz, tilimiz ve urf-adetlerimizdir. Vazifemiz – dinimizge saip çıqmaq, tilimizni bilmek ve ecdatlarımızdan qalğan urf-adetlerimizni kütmektir”, – dedi Müfti efendi.
Kitapnıñ müellifleri Zenife Ablayeva ve Gülnara İlyasova cıyıntıqnı toplamaq fikiri nasıl peyda olğanını, kitapnıñ qahramanları olğan insanlarnıñ hatıralarını toplav ve işlevi aqqında tarif ettiler.
“Kitapnı tertip etkende, biz Qırımnıñ farqlı rayonlarını ziyaret ettik, sürgünlikni yaşağan qartlarımıznen körüştik, olarnıñ hatıralarını kamerağa yazdıq. Bu ebediy qalacaq hatıradır. Böyle dehşetli künlerni körgen insanlar, qorqunç vaqialar, keder ve ğayıplarına baqmadan, güzel insanlar qalaraq, imanlarını coymadılar. Şu iman olarğa ayatta qalıp, vatanlarına qaytmağa yardım etti. Onıñ içün kitapnı “Qalpte iman ile” dep adlandırmaq qararına keldik”, – paylaşa müellifler.
Teatrniñ sanasında artistler sürgünlikten evel qırımtatarlarnıñ Qırımda nasıl yaşağanını ve sürgünlik gecesi vaqialarını sanalaştırıp, numayış ettiler.
Tedbirniñ resmiy qısımından soñ kitapnıñ müellifleri avtograflarnı berip, oquyıcılarnen qonuştılar.
Qırım MDİ matbuat hızmeti
