Qırım Cumhuriyeti ve Sevastopol şeeri musulmanları diniy idaresinde “Bahçisarayskiye kolbası” (“Bağçasaray kolbasları”) ticariy markasını temsil etken iş adamı Ümerova Anife Calalovnağa elâllıq sertifikatı taqdim etildi.
İnsanlarnıñ eyiligi oğurında eyi çalışmalar tilep, vesiqanı Qırım ve Sevastopol Müftisi hacı Emirali Ablayev “Bağçasaray kolbasları” TM vekili – kolbas tsehiniñ rehberi Ruslan Muhamecanovğa taqdim etti. “Kün-künden Qırımda elâl istihsalcılarnıñ sayısı ep artqanı quvandıra. “Elâl” sertifikatı müşterilerniñ işançını qazanğan bir simvol oldı. Qırım sakinleriniñ çoqusı “Elâl” tamğası olğan mallarnı saylay”, – dep, qayd etti Qırım musulmanlarınıñ diniy yetekçisi. Qayd etmeli ki, iş adamı Anife Ümerova kolbaslar ve islengen mahsulatlar istihsalını idare ete.
İhtar: Elâllıq sertifikatını almağa istegen iş adamları QMDİ “Elâl” sertifikatsiyası merkeziniñ başlığı Remzi Qurtdedege nevbetteki telefon boyunca muracaat ete bile: +79780741847, ya da el.adres: halal@qmdi.ru
Qırım MDİ matbuat hızmeti