Bağçasaraynıñ Orta camisinde cami yanında açılğan yazlıq lager öz işini yekünledi. Din ocası Leniye Emirovanıñ sözlerine köre, bu sene yazlıq lagerge 80 qız ve oğlan qatnadı. “Biz oquv programmasını diniy ve medeniy qısımlarına böldik. Balalar büyük ğayret ile bilgi almağa tırıştı, yazlıq lagerniñ soñunda ise, biz olarğa İsmail Gasprinskiyniñ ev-müzeyine ekskursiyanı teşkil ettik”, – dep, qayd etti Leniye Emirova.
Hatırlatamız, yaz tatilleri devamında Qırımda camiler yanında yazlıq lagerleri çalışa ve olar yerli eali arasında pek populârdır. Böylece, bugünki künde Qurman rayonındaki Buzavçı (Novopokrovka) köyüniñ ve Aqmescit şeerindeki Hoşkeldi qasabasınıñ sakinleri büyük isteknen öz mesken yerlerinde teşkil etilgen yazlıq lagerlerine qatnaylar.
Qırım MDİ matbuat hızmeti