Bağçasaraydaki Orta camide siyer – Muhammed Peyğamberniñ (s.a.s.) ayat yolu boyunca bilgi yarışı olıp keçti. Bilgi yarışınıñ iştirakçileri ciddiy azırlıq kördiler. Balalarğa evelceden 100 sual berildi, din ocaları ise, talebelerni yarışqa azırladılar.
Yarış esnasında er bir jüri azası iştirakçilerge onar sual berdi, böylece, er yarış iştirakçisi 50 sualge cevap berdi. Jüri terkibine kirgen Bağçasaray rayonınıñ baş imamı Seitveli İbragimov, Albat (Kuybışevo) köyüniñ imamı Farruh Mamajanov, Bağçasaraydaki Orta Caminiñ imamı Ruslan Asanov ve Tahtalı Caminiñ imamı Ruslan Ahmecanov, Han Çayır qasabasındaki Mahmud Samiy efendi camisiniñ imamı Ahtem Aliyev, Kokköz (Sokolinoye) köyü din cemiyetiniñ reisi Ahtem Tohtarov, Orta Camide ve “Arslan” gençler merkezinde ocalıq yapqan Leniye Emirova, Ulaqlı (Glubokiy Yar) köyünde ocalıq yapqan Feride İbragimova, Bağçasaraynıñ yedinci mikrorayonında din ocası olğan Şuşa Asanova, Zalanköy (Holmovka) köyünde din ocası olğan Merziye Selâmetova ve Qaralez (Krasnıy Mak) köyüniñ din ocası Asiye Bekirova yarışqan balalarnıñ bilgi seviyelerine yüksek qıymet kestiler.
“Musabaqa Peyğamberimiz (s.a.s.) doğğan Rebiu’l-evvel ayına bağışlanıp keçirildi. Tedbirniñ maqsadı – balalarnı Allah Resuliniñ (s.a.s.) ayatı ve ahlâqınen tanış etmektir”, – dep, qayd etti din ocası Leniye Emirova.
Ğalipler em oğlanlar, em de qızlar arasında belgilendi. Oğlanlar arasında birincilikni İsmail Abdullayev elde etti. Ekinci yerni Asan Seytumerov qazandı. Üçünci yerni ise, Enver Mujdabayev aldı. Qızlar arasında birinci yerni Rufina Umarova qazandı, ekinci yerde Alime Abdulkelâmova, üçünci yerni ise, Safiye Abdulmeinova aldı. Ğalipler telefonlar, aqıllı saatlar, ses yükselticileri kibi hatıralıq bahşışlarnen taqdirlendiler.
Siyer yarışına, episi olıp, 41 bala ve 5 üyken iştirakçi qatnaştı. Üyken iştirakçilerden eñ güzel neticelerni köstergenler para mukâfatınen taqdirlendiler.
Qırım MDİ matbuat hızmeti