Qırım Cumhuriyeti ve Sevastopol şeeri Müftisi hacı Emirali Ablayevniñ avalesi ile sentâbr 2 künü Qırımnıñ bütün camilerinde terrorizm qurbanlarınıñ hatırasına bağışlanıp, dualar keçirildi. “İslâm – merhametlik ve barışıqlıq dinidir. İslâm bizge sabır köstermekni ve qarşılıqlı ürmet etmekni ögrete. İç bir dinde terrorizm içün yer yoq. Terrorizmniñ yüzü, milleti dini yoq. Terrorizmni tek birlikte yeñmek mümkün”, – dep, qayd etti Qırım musulmanlarınıñ yetekçisi, hacı Emirali Ablayev.
Qırım bölgelerinde imamlar Terrorizmnen küreş ile emdemlik kününe bağışlanğan mitinglerde iştirak ettiler. Terroristik aktlar sebebinden, öz vazifelerini eda etkeni vaqıt elâk olğanlar, qadınlarnı, balalarnı, yaralanğanlarnı, arqadaşlarını, barışıqlıqnı ve amanlıqnı saqlamaq içün canlarını bergenler sükünet daqiqası ile añıldı.
Bundan da ğayrı, Qırım Müftisiniñ muavini Raim Ğafarov “Beslan balalarına” aktsiyasında iştirak etti. Aktsiya S. İ. Georgiyevskiy adına Tibbiy akademiyada olıp keçti. Aynı şu künü V. İ. Vernadskiy adına Qırım federal universitetinde “Terrorizm mefküresiniñ profilaktikasınen bağlı aktual meseleler” mevzusında tögerek masa ötkerildi.
Bu künlerde Qırımda “Ayat tamçısı” bütünrusiye aktsiyası keçirile. Barışıqlıq ve yapıcı emek adına, Beslan teraktınıñ dehşetli vaqialarını añmaq maqsadınen aktsiya çerçivesinde barışıqlıq avuçları suvnen toldurılıp, ösümlikler suvarıldı.
Qırım MDİ matbuat hızmeti