Zuya camisinde balalar içün Quran oquvı yarışı olıp keçti. Umumen, yarışta 30 bala iştirak etti. Eñ kiçkene iştirakçı 4 yaşında, eñ büyügi ise, 13 yaşında edi. İştirakçilerniñ bilgilerine yerli din hadimleri ve Zuya qasabası camisiniñ imamı Dilâver Osmanovnıñ yolbaşçılığında yerli din cemiyetiniñ temsilcileri qıymet kestiler.
“Öz dinini ögrenmege istegenlerniñ sayısı yıl-yıldan arta. Bu ğayet quvandıra. Ana-babalar balalarnı kiçik yaştan camige ketire. Bu ocalarımız yapqan işniñ güzel neticesidir. Men din ocası Elmaz Çahmarovağa balalarnı yarışqa azırlağanı içün teşekkür bildirem. Qayd etmeli ki, Qırım Cumhuriyeti ve Sevastopol şeeri musulmanları diniy idaresi uzaq köylerde bile dinni doğru menbalardan ögrenmek imkânı olsun dep, elinden kelgenini yapa”, – dedi Qırım Müftisiniñ muavini Raim Ğafarov.
Er bir iştirakçige diplomlar ve bahşışlar berildi. Yarıştan soñ ana-babalar balalarğa lezetli pilâv ve tatlı sofranı azırladılar.
Qırım MDİ matbuat hızmeti