Saq rayonınıñ Qanğıl (Glinka) köyünde İslâm temelleri kursunıñ taleberine muqaddes Qurannıñ nushaları taqdim etildi. “Sekiz qız ilk Quranlarını teslim aldı. Ocalar içün taleberniñ yeñişlerini körmek – büyük ğururdır. Allahqa şükürler olsun”, – dep, öz teessüratlarınen paylaştı din ocası Gülsum İbragimova.
Bundan da ğayrı, Aluşta civarındaki Körbek köyünde de aynı merasim keçirilip, İslâm temelleri kursunıñ 26 qadın-qız talebesine Quran nushaları ediye etildi.
“Keçken sene sınıfımda 12 insan oquy edi, bu sene ise, – 26. Bu ise, qadın-qızlarımıznıñ dinini ögrenmek ve diniy bilgini işançlı menbadan almaq istegenini köstere. Bu al pek quvandıra”, – dedi din ocası Ayşe Okazova.
Qırım MDİ matbuat hızmeti