Qırım Cumhuriyetiniñ Nazirler şurasında Aqmescitteki Büyük Cuma caminiñ qurucılığını yekünlemek maqsadınen bir sıra tedbirlerniñ becerilmesi boyunca iş muşaveresi keçirildi. Muşaverede qurucılıqqa alâqası olğan nazirlikler, idareler, teşkilâtlar ve Qırım Müftiligi iştirak etti. Tedbir QC Nazirler şurası Reisiniñ muavini Mihail Nazarov yolbaşçılığında ötkerildi.
Mihail Nazarov kiriş sözünde qayd etti ki, Büyük Cuma cami külliyesinde qurucılıq işlerniñ çoqusı artıq yekünlendi, qurucı şirket deñişti, ve yaqın zamanda işler tezleştirilecek.
Öz nevbetinde, Qırım MDİ mesül kâtibi Ayder Acimambetov bir sıra çezilecek meselelerni seslendirdi. Olarnıñ arasında elektrik ceryannı teminlegen ağnıñ qurulıp, külliyeniñ saasından 110 kV yüksek voltlıq ağlarnıñ çıqarıluvı, hocalıq ve yağmurlıq kanalizatsiyalarınıñ yapılıp, umumiy ağlarğa qoşulması, radio, internet ve telefon ağlarınıñ keçirilmesi, gaz ağınıñ keçirilip, çalıştırılması ve diger meseleler añaldı.
Buña ilâve olaraq, naqliye içün qoşma yol yolağınıñ yapılması, yol astı keçitiniñ qurulması, cemaat naqliye turağınıñ başqa yerge avuştırılması, Büyük Cuma Cami külliyesi yanından keçken avadaki kabel ağlarınıñ cami saasından uzaqlaştırılması, trolleybus ağlarınıñ da yerleri deñişmesi zaruriyeti seslendirildi.
Bundan da ğayrı, tedbir iştirakçileri Büyük Cuma cami yanında yerleşken ormanlıq saanıñ Qırım MDİ mülkiyetine keçirilüvi protsedurasını ve bu topraqnıñ abadanlaştırıluvı meselesini muzakere etttiler.
Muşavereniñ neticesinde er afta vitse-premyerniñ yolbaşçılığında muşavelerni keçirmek ve qurucılıq esnasında peyda olğan meselelerni operativ şekilde çezmek qararı alındı.
Hatırlatamız, 2021 senesi, mayıs 17 künü Rusiye Prezidenti Vladimir Pütin RF ve Qırım akimiyetlerine, alâqadar teşkilâtlarnı celp etip, Aqmescitteki Büyük Cuma caminiñ qurucılığını yekünlemege destekçi olmalarını avale etti. Bunı ifade etken madde mart 18 künü Qırım Cumhuriyeti ve Sevastopol şeeriniñ cemaatçılığı vekillerinen keçirilgen körüşüvniñ neticesinde berilgen avaleler arasında mevcuttır.
Qırım MDİ matbuat hızmeti
