Keçken raatlıq künleri Qurman rayonınıñ Buzavçı (Novopokrovka) köyü camisi yanında alıp barılğan İslâm temelleri kursunıñ talebeleri ekskursiyağa çıqıp, Aqmescitte qurulayatqan Büyük Cuma camini ve Bağçasaraynıñ ziyaret yerlerini – Qırımtatar tarihı ve medeniyeti müzeyini (Hansaraynı) ve Zıncırlı medreseni kezdiler. Balalarnı kezintige Buzavçı köyüniñ imamı Alim Samedinov ve din ocası Elviza Bekirova alıp bardılar.
“Biz uzaqta yerleşken köylerde yaşağan balalarnıñ ufuqlarını keñleştirmege yardım etmek kerekmiz.Bunıñ içün tarihiy yerlerni ziyaret etüv pek faydalıdır”, – dep, qayd etti din hadimleriniñ işini idare etken Qırım Müftisiniñ muavini Raim Ğafarov.
Meraqlı bir künniñ soñunda ocalar ve talebeler “Alem” restoranına ziyafetke bardılar.
Qırım Cumhuriyeti ve Sevastopol şeeri musulmanları diniy idaresi Bağçasaray tarihiy-medeniy ve arheologik müzey-qoruqnıñ müdiri vazifesini vaqtınca yerine ketigen Valeriy Vegeşa ve onıñ muavini Reşat Aliyevge Hansarayğa ve Zıncırlı medresege ekskursiyanı teşkil etmekte destek köstergenleri içün olarğa teşekkür bildire. Qırım Müftiligi “Alem” restoranınıñ rehberleri İsa ve Ayder Haybullayevlerge teşekkür ete.
Qırım MDİ matbuat hızmeti