İçki rayonınıñ Savurçı (Zavetnoye) köyünde tantanalı şekilde caminiñ temelini qoyuv merasimi olıp keçti. Cami içün topraqnıñ ayırıluvı meselesi bölgeniñ baş imamı Mustafa Mustafayev ile yerli musulmanlarnıñ teşebbüsi ve Qırım Cumhuriyeti ve Sevastopol şeeri musulmanları diniy idaresiniñ destegi ile çezildi. Temel qoyuv merasimi muqaddes Qurannıñ oquluvı ile başlandı. Qırım ve Sevastopol Müftisi hacı Emirali Ablayev adından Müfti muavini Raim Ğafarov çıqışta bulundı. O, Savurçı köyüniñ sakinlerini bu çoqtan beklenilgen vaqianen hayırladı.
“Ramazan ayında hayırlı işni başlamaq – Qırım musulmanları içün ğayet simvoliktir. Qırımda daa bir Allahnıñ evi qurulacaq. Bu tek köyniñ sakinleri içün degil, bütün Qırım musulmanları içün büyük quvançtır”, – dep, qayd etti Raim Ğafarov.
Qırım Müftisi hacı Emirali Ablayev adından ayrı minnetdarlıq caminiñ qurulışı içün topraqnıñ ayırıluvında destek köstergen İçki rayon memuriyetiniñ başlığı Viktoriya Gritsayğa bildirildi.
Tedbirde İçki rayon memuriyetiniñ başlığı Viktoriya Gritsay, Savurçı köy şurasınıñ reisi Ölga Fisenko, din hadimleri ve etraftaki köylerniñ sakinleri bulundılar.
Köyniñ sakinleri cami qurulacaq yerde qurban çaldılar. Bu qurbanlıq etinen oraza tutqan insanlar sıylanacaq.
Qırım MDİ matbuat hızmeti