İ. Ya. Franko adına Qırım cumhuriyet universal ilmiy kitaphanesinde yaş ressam Osman Beytullayevniñ Zenife Ablayeva ve Gülnara İlyasovanıñ qırımtatar halqınıñ Qırımdan zorbalıqnen sürgün etilmesine bağışlanğan “Qalpte iman ile” kitabına azırlağan resimleriniñ sergisi olıp keçti. Tedbir İ. Ya. Franko adına Qırım cumhuriyet universal ilmiy kitaphanesi ve Halqlar dostluğı eviniñ destegi ile Qırım Cumhuriyeti ve Sevastopol şeeri musulmanları diniy idaresi tarafından teşkil etildi.
Kitapnıñ müellifleri toplanğanlar ögünde çıqışta bulunıp, 1944 senesi, mayıs 18 künü sürgünlikni öz közlerinen körgen şaatlarnıñ hatıralarınen paylaştılar. “Bu kitapnı tertip etkende, biz, kerçekten de, er bir ikâyeni içten is etik. Resimlerde siz tek eki tüsni köre bilesiñiz – qara ve beyaznı, çünki facianı tek qara tüs ile aks etmek mümkün”, – dedi Zenife Ablayeva.
Kitap müellifleri sürgünlik şaatlarınıñ sayısı kün-künden eksilgenine ayrı urğu yaptılar. “Biz – sürgünlikni körgen qartana-qartbabalarnıñ qollarında ösken nesilmiz. Olarnıñ, evde ötmek qalmağanda, qorqqanına şaat oldıq, çünki olar açlıqnı kördiler”, – dedi Gülnara İlyasova.
Resimlerniñ müellifi Osman Beytullayev onı tesirlegen ve resimlerde aks etilgen “Qalpte iman ile” kitap qaramanlarınıñ ikâyeleri aqqında tarif etti. Yaş ressam hatıra cıyıntığı üzerinde işini devam etecegini ve mayıs ayınıñ soñuna qadar sergi eksponatlarınıñ sayısı artacağını bildirdi.
Qırım MDİ matbuat hızmeti