Qırım Cumhuriyeti ve Sevastopol şeeri musulmanları diniy idaresinde Müftilikniñ sertifikatsiya merkezi daa bir iş adamına “Elâl” sertifikatını berdi. Aqmescit rayonınıñ Pionerskoye köyünde çalışqan fermer köy hocalığınıñ rehberi Ridvan İsmailovğa sertifikatnı Qırım Müftisiniñ muavini Ayder İsmailov taqdim etti. Şirket bödene quşlarını asrap, soyup sata.
“Halqımıznıñ ve bütün Qırım ealisiniñ hayırına çalışmaqlar tileymiz. Rabbimiz işleriñizde yardımcı olsun”, – dedi Ayder İsmailov.
Ridvan İsmailovnıñ şirketi artıq eki yıl devamında şeriat qaideleri boyunca çalışa.
Merkezniñ hadimleri şirkette quşlar soyulğan yerdeki şaraitni, donatmalarnıñ çalışuv usulını, quşlar baqılğan yerlerni ögrenip, konsultativ yardımnı kösterdiler.
Soyuv QMDİ-niñ “Elâl” sertifikatsiya merkezi tarafından tasdiq etilgen quşlarnıñ soyuvınen alâqalı ükümler ve qaidelerine uyğun şekilge ketirilgenden soñ, şirket içün “Elâl” sertifikatını daa bir yılğa devam ettirildi.
Qırım MDİ matbuat hızmeti
