Qırım Cumhuriyeti ve Sevastopl şeeri musulmanları diniy idaresiniñ Qalay islâmiy ilimler medresesinde ağımki oquv yılınıñ birinci yarısınıñ neticelerine bağışlanğan umumiy ana-baba toplaşuvı olıp keçti. Birinci semestrniñ yekünlengeni sebebinden talebelerni Qırım Müftisiniñ muavini Ayder İsmailov hayırladı. O, qayd etti ki, medreseniñ missiyası tek diniy bilgilerni bermek degil, yaş nesilde vatanperverlik duyğusını, milletke ve milliy ananelerge sevgini aşlamaqtır.
“Biz tek dinimizge nisbeten degil, milliy qıymetlerimizge de sevgini aşlamaq kerekmiz. Esas ğayemiz – qırımtatar milletini assimilâtsiyadan qorçalamaq, milletke ve Vatanğa faydalı olmaq, siz, ana-babalar olaraq, balalarğa bu ğayeni yetkizdirmek kereksiñiz”, – dep, qayd etti Ayder İsmailov.
Medrese müdiri muavinleriniñ sözlerine köre, oquv yılınıñ birinci qısımında talebeler yahşı neticelerni kösterdi.
Balalar tatilden qaytqan soñ, olarnı güzel sürpriz bekley.
“Qış tatili devamında biz gaz donatmalarınıñ montajını devam etip bitirecekmiz ve test rejiminde işletecekmiz, ekspertizadan soñ ise, sistema işke kirsetilecek. Endiden medreseniñ bütün binalarında sıcaq olacaq”, – dep ayttı Edem Lümanov.
Al-ı azırda Qalay islâmiy ilimler medresesinde 33 oğlan ve 30 qız diniy tahsil ala. Bundan da ğayrı, hafızlar medresesinde 27 talebe oquy.
QMDİ matbuat hızmeti
