Qırım musulmanları diniy idaresinde iş adamı Asanov Ruslan Şevketoviçke elâllıq sertifikatı taqdim etildi. Onıñ şirketi Bağçasaray rayonınıñ Aromatnoye köyünde kiçik ve büyük baş ayvanlarnı kese. Müftilikniñ elâllıq sertifikatsiyası merkeziniñ mütehassısları şirket yerinde kerekli işlerni keçirip, ayvan çalınmasınıñ şariatqa uyğunlığını teşkerdiler ve, neticede, teşkerüv aktını tizip, elâllıq sertifikatını berdiler.
Sertifikatsiya merkezi şirketniñ işini nezaret astına alıp, oña dinge uyğunlıq meselelerinde konsultatsiya hızmetini de berecek.
Sertifikat bir yıl devamında keçerli olacaq, soñra, yañıdan teşkerüvden keçip, onı devam ettirmek mümkün olacaq.
Qırımda Qırım musulmanları diniy idaresiniñ elâllıq sertifikatsiyası ve standartizatsiya merkezinden sertifikatlarını alğan şirketler mallarını Qırım MDİ logotipinen çıqara.
Hatırlatamız, Qırım Müftiligi Qırımdan tış “elâl” tamğasınen çıqarılğan mallarğa çoq diqqatlı olmağa çağıra. Qırım Müftiligi QMDİ-niñ logotipi olmağan mallardan mesülietli degildir.
QMDİ matbuat hızmeti