Qırım Cumhuriyeti ve Sevastopol şeeri Müftisiniñ muavini Esadullah Bairov “Qırım. Refah – birlik ile” fotoalbomınıñ taqdim tebrinde iştirak etti. Tedbir Qırım Cumhuriyetiniñ Miletlerara munasebetler boyunca devlet komitetinde olıp keçti. Esadullah Bairov tedbir musafirlerini Qırım musulmanlarınıñ yetekçisi hacı Emirali Ablayev adından selâmladı ve çoqmilletli Qırımda yaşağan halqlar aqqında tarif etken kitaplar basılmasınıñ müimligini qayd etti. “Böyle leyhalar vastasınen biz bir-birimizni daa yahşı tanıymız. Eminim, fotoalbom Qırım sakinleri ve cumhuriyetimizniñ musafirleri içün ğayet meraqlı olacaq, medeniyetlerara dialognıñ inkişafına büyük siltem berecek”, – dep, qayd etti Esadullah Bairov.
Tedbirde Qırım Cumhuriyeti ve Sevastopol şeeri musulmanları diniy idaresini (Tavriya Müftiyatını) Aqmescit şeerindeki Kebir caminiñ imamı İsmail Ablayev de temsil etti. Neşirniñ taqdim merasiminde Qırım Cumhuriyeti Devlet Şurası Reisiniñ muavini Edip Ğafarov, Qırım Cumhuriyeti Milletlerara munasebetler boyunca komitet reisiniñ birinci muavini Ruslan Yaqubov, Qırım Cumhuriyeti İçki siyaset, malümat ve bağ naziriniñ muavini, içki siyaset idaresiniñ başlığı Yelizaveta Gluşçenko, Qırım Cumhuriyeti Cemaat palatası Apparatınıñ rehberi Vladimir Degtâröv, milliy-medeniy muhtariyetlerniñ ve cemaat teşkilâtlarınıñ vekilleri ve müessiselerniñ yolbaşçıları iştirak ettiler.
Fotoalbomda Qırım Cumhuriyetiniñ bölgedeki milliy-medeniy muhtariyetleriniñ faaliyeti aqqında unikal fotosüretler ve diger materiallar yer ala. Neşirniñ maqsadı – milliy şahsiyetimizniñ ve bir çoq milletniñ medeniyeti bir-birine qarışıp qaynaşqan zengin ve unikal tarihımıznıñ qorçalanmasıdır.
Qayd etmeli ki, fotoalbom Milletlerara muasebetler boyunca devlet komitetiniñ qoltutuvı, “Ödissey” ilim, medeniyet ve kino inkişafına destek fondunıñ destegi ile İsmail Gasprinskiy adına Mediamerkez tarafından neşir etildi.
QMDİ matbuat merkezi