2021 senesi, mart 11 künü Bağçasaraydaki Orta camide Bütünqırım “Ezan sedası” müezzinler yarışınıñ nevbetteki saylav turı olıp keçti. Yarışta farqlı yaş kategoriyasında olğan 10 insan iştirak etti.
Yarış neticesinde kiçikler kategoriyasında Halid Abdulmeinov (6 yaşında), orta yaş kategoriyasında Aziz Qaraqaş (20 yaşında), büyükler kategoriyasında Rustem Asanov (74 yaşında) ğalebe qazandılar.
Jüri terkibine İslâm temelleri ocaları, Qalay medresesiniñ ocaları, Qırım ve Sevastopol şeeri musulmanları diniy idaresiniñ hadimleri kirdi. Ezanlarnıñ icrasına bir qaç kriteriy boyunca qıymet kesildi: doğru telâffuz, maqam ve sesniñ gürligi.
Saylav turları artıq Cürçi qasabası ve Aqmescit şeerinde keçti.
Ezannıñ oqulması boyunca yarışnıñ finalına keçmek içün 6 ile 50 ve daa yuqarı yaşta olğan er kişiler iştirak ete bile.
Hatırlatamız, saylav turları mart-aprel ayları devamında, Ramazan ayına qadar ötkerilecek. Yarışnıñ finalı Ramazan ayından soñ keçirilecek.
Eñ güzel ezan oquyıcılarını mütehassıs jüri azaları belgileycek, ğaliplerni taqdirnameler ve yarış sponsorlarından hatıra bahşışları bekley.
Nevbetteki saylav turı 2021 sene, mart 16 künü Aqmeçit (Çernomorskoye) qasabasında ötkerilecek.
QMDİ matbuat hızmeti
