“Ezan sedası” müezzinler yarışınıñ saylav turları Aqmescitteki Boğurça qasabasında ve Canköy şeerinde olıp keçti.
Jüri terkibine Qalay medresesiniñ ocaları ve müftiligimizniñ hadimleri kirdiler. Jüri farqlı yaş kategoriyalarında olğan müezzinlerni saylap aldı.
Boğurçada, birinci kategoriyada Ali Ebubekirov (8 yaşında) ve Bekir Qadırov (10 yaşında), ekinci kategoriyada Vadim Sumedlâyev (25 yaşında) ve Mustafa Mustafayev (49 yaşında) birinci yerlerni qazandılar. Üçünci kategoriyada Sadi Akimov (78 yaşında) ğalip oldı.
Canköyde ötkerilgen yarışta Müslim Acibekirov, Ramazan Aşirbaryamov, Zakir Ablâzov, Rasul Abdullayev, Rustem Aripov, Enver Qasımov ğalip çıqtılar.
Yarışnıñ saylav turları devam ete. Finalğa keçmek içün 6 ile 50 ve daa yuqarı yaşta olğan er kişiler iştirak ete bileler.
Hatırlatamız, saylav turları mart-aprel ayları devamında, mubarek Ramazan ayına qadar keçirilecek, yarışnıñ finalı ise, Ramazan ayından soñ ötkerilecek.
Eñ güzel müezzinlerni mütehassıs jüri azaları belgileycek, ğaliplerni taqdimnameler ve yarış sponsorlarından hatıra bahşışları bekley.
Nevbetteki saylav turu mart 30 künü Qurman qasabasında keçirilecek.
Qırım MDİ matbuat hızmeti
