Curçı rayonı Aybar köyünde “Men muvafaqiyetlim!” 2-nci yazlıq lageri öz işini başladı. Lagerni “Halqara İslâm Missiyası” MCT, Qırım Müftiyatı ile yerli “Curçı” din cemiyeti teşkil ettiler.
Esas maqsad – yaşlarğa İslâm dini esasında ayat degerliklerini aşlamaq, liderlik qabiliyetlerini inkişaf etmek, nutuq medeniyeti esaslarını añlatmaqtır.
Lagerniñ işinde Aybar, Oy-Mamşaq, Çernovo, Devlet Ali, Totman köylerinden 8-11 sınıf talebeleri iştirak eteler. Böyleliknen, 20 bala seminar, interaktiv oyunlar, dersler, kvestlerge qoşulıp, eñ eyi tabiat çizgilerini inkişaf etip, liderlik ve kommunikativ alışqanlıqlarını eyileştirip olurlar.
Teşkilâtçılar balalar içün Bağçasarayğa kezinti teşkil etmek niyetindeler. Böyle etip, lager iştirakçilerine Qırımnıñ tarihını añlatıp, dostluq munasebetlerini pekitmege isteyler.
QMDİ MDT matbuat hızmeti
