Aqmescitniñ Beloye-5 qasabası camisiniñ azbarında Qurban bayramına bağışlanğan tedbir olıp keçti. Dindaşlarnı bayramnen hayırlamaq içün bayramğa Qırım Cumhuriyeti ve Sevastopol şeeri musulmanlarınıñ Müftisi haci Emirali Ablayev teşrif buyurdı. Qırım musulmanlarınıñ diniy yetekçisi yerli sakinlerni bayramnen hayırladı ve qısqa vaaznen çıqışta bulundı. “Biz bir-birimizge ürmet ile davranmaq kerekmiz. İç bir vaqıt yalan aytmañız, çünki yalannı Allah Taalâdan gizlep olamazsıñız. Qadın-qızlarımıznı qorçalayıq – olar analardır, olar kelecek nesilniñ terbiyesine büyük tesir eteler. Bizge ise, farqlı tüşüngen yañı nesilni terbiye etmek kerek. Bugün üstümizge tüşken tek bir şey bar – çalışmaq. Biz gece-kündüz çalışmalımız, dinimizni ğayrıdan tiklemek kerekmiz, insanlarğa İslâmnı ögretmelimiz. İslâm – itaat ve terbiye demektir. Biz, işte, buña ögretemiz”, – dedi hacı Emirali Ablayev.
Yerli sakinlernen qonuşqan soñ, Qırım musulmanlarınıñ diniy yetekçisi hacı Emirali Ablayev Qırım Cumhuriyeti ve Sevastopol şeeri musulmanlarınıñ diniy idaresi (Tavriya Müftiyatı) adından Beloye-5 qasabasında cami yanında ötkerilgen din terbiyesi kurslarınıñ ocaları İlmiy Ğaniyevge, Eliana Ğaniyevağa, Sultaniye Karimovağa, Zarema Ablayevağa, Zamira Smailovağa, Ayşe Adilovağa ve cemaat erbabı Çingiz İbragimovğa teşekkürnameler taqdim etti.
Bundan da ğayrı, Müfti “Eñ lezetli pilâv” yarışınıñ ğaliplerini taqdirledi. Kulinar yarışnıñ neticesinde Aqmescitniñ Hoşkeldi qasabasından aşçı Ayder Haybullayev birinci yerni qazandı. Ekinci yerni Aqmescitniñ Aqmeçit qasabasından aşçı Eskender Ablâlimov aldı. Üçünci yerge ise, Maryino qasabasınıñ sakini Damir Bilâlov nail oldı. Ğalipler ve yarış iştirakçileri teşekkürnameler ve bahşışlar ile taqdirlerdiler.
Qayd etmek kerek ki, Qırım Müftiyatı, Milletlerara munasebetler boyunca devlet komiteti ve Aqmescit şeeri memuriyeti tarafından teşkil etilgen Qurban bayramını tantanalı şekilde qayd etüv merasimi şiddetli yağmur sebebinden qısqartıldı, kontsert ise, asıl da lâğu etildi.
QMDİ matbuat hızmeti