Qırım Cumhuriyeti ve Sevastopol şeeri musulmanları diniy idaresinde Qırım ve Sevastopol Müftisi hacı Emirali Ablayevniñ rehberliginde bölge baş imamlarnıñ er aylıq toplaşuvı olıp keçti. Qırım musulmanlarınıñ diniy yetekçisi Allahqa hızmet, vatanperverlik ve öz milletine sevgi aqqında tarif etti. Bundan da ğayrı, o, Oraza bayramı ve Ramazan ayında keçirilgen tedbirlerniñ neticesi çıqardı.
“Mubarek Ramazan ayı kene musulmanlarğa onda birleşmek kerek olğanını hatırlattı. Biz beraber oraza tuttıq ve orazalarımıznı açtıq. Bizim esas istegimiz ve ümütimiz – halqımız barışıqlıq ve birdemlik içinde tuvğan toprağında yaşasın, öz diniy ve milliy tedbirlerini amanlıq içinde keçirsin”, – dedi hacı Emirali Ablayev.
Körüşüv esnasında diniy hadimler aktual iş meselelerini ve kelecek ayğa planlarını muzakere ettiler.
Toplaşuvnıñ soñunda baş imamlar bölgelerinde musulmanlar arasında darqatmaq içün “Hidayet” gazetasınıñ yañı sanını aldılar.
Qırım MDİ matbuat hızmeti