Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayevniñ rehberliginde bölge baş imamlarınıñ er aylıq toplaşuvı olıp keçti. Qırım musulmanlarınıñ diniy yetekçisi musulmanlarnıñ baş bayramlarından biri olğan Qurban bayramınıñ qayd etilüvinen bağlı tedbirlerniñ azırlanmasına ayrı diqqatnı çekti. Bu sene dünya musulmanları bayramnı iyül 9-12 künleri qayd etecek. “Bütün musulmanlar, hususan, muhtac olğan dindaşlarımız bayram ve birlik müitini duymaq kerekler”, – dep, qayd etti hacı Emirali Ablayev.
Tedbir devamında Qırım musulmanlarınıñ diniy yetekçisi Aqmeçit (Çernomorskoye) rayonınıñ baş imamı Löman Abduramanovnı yubileyi ile hayırlap, Allahnıñ yolunda çoq yıllıq hızmeti içün teşekkürnameni taqdim etti. Körüşüv devamında din erbapları ağımdaki iş meselelerni, şu cümleden musulmanlarnı hacılıqqa yollamaq meselesini muzakere ettiler. Toplaşuvnıñ soñunda bölgelerniñ baş imamları Qırım MDİ “Hidayet” gazetasınıñ yañı sanını bölgelerinde musulmanlarğa darqatmaq içün aldılar.
Qırım MDİ matbuat hızmeti