Hacı Emirali ABLAYEV: “Medrese mezunları halqqa hızmet etecek” | ЦРО ДУМК

Среда

22

мая

14
Зуль-къаде
1445 | 2024
Утр.3:11
Вос.4:56
Обед.12:45
Пол.16:45
Веч.20:23
Ноч.22:08
Времена намазов
Календарь 2024

Намаз

Hacı Emirali ABLAYEV: “Medrese mezunları halqqa hızmet etecek”

Опубликовано:

İmam Maturidiy adına Qalay islâmiy ilimler medresesiniñ oğlanlar bölüginde mezuniyet bayramı olıp keçti. Mezunlarğa diplomlarını Qırım Cumhuriyeti ve Sevastopol şeeri Müftisi hacı Emirali Ablayev taqdim etti. Qırım musulmanlarınıñ diniy yetekçisi oquv yurtunı bitirgen 15 mezunnıñ ana-babasına muracaat etip, balalarına maarif yolunda destek köstermege ve oquvlarını devam ettirmege imkân bermege çağırdı. “Balalarıñız Yüce Allahqa hızmet yolunı sayladı. Olar halqqa hızmet etmek, cemiyetke fayda ketirmek, şeerlerimizde, köylerimizde İslâm nurunı saçmaq kerekler. Oquv medrese divarlarınen sıñırlı degildir. Bu büyük yolda birinci adımdır. Balalarıñızğa tahsillerini devam ettirmege imkân beriñiz”, – dedi hacı Emirali Ablayev.

Qırımda İslâmnıñ çoq yıllıq tarihı aqqında tarif etken Müfti ananeviy qıymetlerniñ saqlanıluvınıñ müimligini ayrıca qayd etti. “Bizim ata-dedelerimiz ağır cenk ve sürgünlik yıllarında açlıq çekti, amma Yüce Rabbimizge imanını coymadı. Bugün biz ecdatlarımıznıñ hatırası içün dinimizni ögrenmek kerekmiz. Bugün bizde olarda olmağan imkânlar bar”, – dep, yekün çekti hacı Emirali Ablayev.

İmam Maturidiy adına Qalay islâmiy ilimler medresesiniñ müdiri Edem Lümanov medrese mezunlarına oğurlı yollar tiledi. “Üç oquv yılı devamında biz sizge milliy ananelerimiz ve dinimizniñ temelleri aqqında bilgi berdik, sizni terbiye ettik. Quran-ı Kerimde buyurılğanı kibi, er baba balasına güzel terbiye bermek kerek. Fikirimce, biz şu işni güzel becerdik”, – dep, qayd etti Edem Lümanov.

Mezunlarnıñ ana-babaları da tesirli hayırlav sözlerini azırladılar. Olar Qırım Müftiligine ve ocalarğa medresede diniy bilgi almaq imkânı içün teşekkür bildirdiler.

Mezunlar da, elbette, videolevhalarnı azırlap, öz minnetdarlığını bildirdiler. Ocalar, ana-babalarğa sıcaq sözler aytıldı. “Biz ocalarımıznen beraber saylağan yolumıznı devam ettirecekmiz”, – deyler İmam Maturidiy adına Qalay islâmiy ilimler medresesiniñ mezunları.

Qırım MDİ matbuat hızmeti