Qırım Cumhuriyeti ve Sevastopol şeeri musulmanlarınıñ Müftisi hacı Emirali Ablayev İmam Maturidiy adına Qalay islâmiy ilimler medresesiniñ qızlar bölügi mezunlarınen körüşti. Suhbet devamında Qırım ve Tatarstannıñ aliy oquv yurtlarında tahsilni devam etmek imkânları muzakere etildi. Buña ilâve olaraq, medrese mezunları yaşağan yerleriniñ cemaatı içün yazlıq İslâm temelleri kurslarını teşkil etmek isteklerini bildirdiler. “Mezuniyet aqşamıñızda aytqanım kibi, er bir başlağan işniñ neticesi ola. Siz medresedeki tahsilleriñizni tamamladıñız. Siz belli bir yol keçtiñiz. Amma, bu – büyük bir yolnıñ başlanğıçıdır. Bundan soñ halqqa ve Haqqa hızmet yolu başlana”, – dedi hacı Emirali Ablayev.
Müftiniñ qayd etkenine köre, fikir etken insan daima diniy tahsilni almağa tırışa. “Siziñ üstüñizde büyük mesüliet bar. Kelecekte siz ana olacaqsıñız. Er şey sizge bağlı. Yaş nesilniñ terbiyesi siziñ elleriñizde. Siz ertaraflı bilgige saip olmalısıñız. Bundan soñ, siz, medrese mezunları olaraq, ocalarıñıznıñ yanında yürüceksiñiz, halq arasında İslâm nurunı saçacaqsıñız”, – dep, qayd etti hacı Emirali Ablayev.
Hatırlatamız, bu sene İmam Maturidiy adına Qalay islâmiy ilimler medresesini em oğlanlar bölüginde, em qızlar bölüginde 15-yer talebe bitirdi. Mezunlar devletniñ aliy diniy oquv yurtlarında tahsillerini devam ettirmek isteklerini bildirdiler.
Qırım MDİ matbuat hızmeti