Qırım Cumhuriyeti ve Sevastopol şeeri musulmanları diniy idaresinde (Tavriya Müftiyatında) Qırım Müftisi hacı Emirali Ablayevniñ yolbaşçılığında bölgelerniñ baş imamları ile körüşüv olıp keçti.
Qırım musulmanlarınıñ maneviy yetekçisi Yüce Rabbimizge hızmet etmek, vatanperverlik ve halqına sevgi aqqında laqırdı etti. Bundan da ğayrı, hacı Emirali Ablayev qısmiy mobilizatsiya çerçivesinde çağırılğan Qırım musulmanları ile keçken körüşüvi aqqında tarif etti. “Sizni qısmiy mobilizatsiya çerçivesinde çağırılıp ketken bütün askerler içün dua etmege çağırım. Olarnıñ sağ-selâmet evlerine qaytmaları ve ailelerine qavuşmaları içün dua etemiz. Semetdeşlerimizge maneviy küç bermek içün siz qaviy iman ve köterinki ruh saibi olmalısıñız”, – dep, din hadimlerine muracaat etti hacı Emirali Ablayev.
Körüşüv devamında ağımdaki iş meseleleri muzakere etildi.
Toplaşuvnıñ soñunda bölge baş imamlarına bölgelerindeki musulmanlar arasında darqatılması içün QMDİ-niñ neşiri – “Hidayet” gazetasınıñ yañı sanı teslim etildi.
QMDİ matbuat hızmeti