Qırım Cumhuriyeti ve Sevastopol şeeri Müftisi hacı Emirali Ablayevniñ avalesi ile Qırım Cumhuriyeti ve Sevastopol şeeri musulmanları diniy idaresiniñ hadimleri Aqmescitte, Strelkovaya soqağında yerleşken Ayşe Sultan camisiniñ azbarında terek fidanlarını saçuv aktsiyasını keçirdiler. Qırım Müftisiniñ muavini Raim Ğafarovnıñ sözlerine köre, umumen 300 qadar tüp terek saçıldı. “Bugün biz 60 tüp servi, 50 tüp ardıç, 40 tüp yüke, 150 tüp çınar fidanı saçtıq. Peyğamberimiz (s.a.s.) böyle buyurğan edi: “Eger qıyamet yaqınlaşsa, biriñizniñ elinde de fidan olsa, qıyamet qopmadan, onı saçmağa yetiştirseñiz, saçıñız”. Biz, aqiqaten, hayırlı iş becerdik, 300 tüp terek saçtıq”, – dep, qayd etti Raim Ğafarov.
Qırım MDİ matbuat hızmeti