Cürçi qasabasınıñ merkeziy camisinde İslâm temelleri ve diniy hızmet boyunca “Halq medresesi” kursunıñ talebelerine tantanalı müitte sertifikatlar berildi.
Eki yıl devamında oqup, kursnı 25 talebe bitirdi.
Qırım Müftisi adından “Halq medresesi” kursunıñ mezunlarını QMDİ malümat ve neşir bölüginiñ rehberi Emir-Asan Ümerov hayırladı. O, talebeler köstergen ğayretlerini taqdir etip, ilerideki faaliyetlerinde muvafaqiyetler tiledi.
“Dinimizni ögrenmek – em büyük nimettir, em de mesüliettir. Ocalarıñız siznen bilgilerinen paylaşqanı kibi, siz de digerlernen paylaşmaq kereksiñiz”, – dep qayd etti Emir-Asan Ümerov.
Hatırlatamız, QMDİ “Halq medresesi” leyhası eki yıl devamında çalışa, kurs mezunlarınıñ sayısı 200 insanğa yetti. Leyhanıñ maqsadı – cumhuriyette çalışacaq diniy hıdimlerni azırlamaqtır.
QMDİ matbuat hızmeti