Aqyarda Qırım, Lehistan, Litvaniya, Aqrusiye müftisi, belli qırımtatar siyasetçisi ve cemaat erbabı Noman Çelebicihannıñ hatırasına bağışlanğan tedbir olıp keçti. Tedbir teşkilâtçıları – Aqyarnıñ qırımtatar cemaatçılığıdır.
Tedbirde Qırım Müftisiniñ muavini Raim Ğafarov iştirak etti. Tedbir başlanmadan evel, o, Qırımnıñ ulu oğlu içün dua oqudı.
“Noman Çelebicihan Qırımnıñ tarihında büyük iz qaldırdı. O, tek siyaset erbabı degil de, yazıcı, şair, alim edi. Amma, ilk evelâ, o, din erbabı olaraq bellidir, çünki halqqa hızmet – Allahqa hızmettir. “Halq” sözüni aytqanda, o, tek bir halqnı ya da dinni degil de, aksine, ne qadar farqlı olsaq da, epimizni bir güldesteni teşkil etken çiçekler olaraq köre edi. Bu büyük ğaye oğurında, o, faniy dünyanı terk etti”, – dep ayttı Raim Ğafarov.
Tedbir müellifi Noman Çelebicihan olğan Qırımtatar milliy gimni “Ant etkenmen” ile başlandı. Toplanğanlar ögünde hormeyster Naciye Filimonovanıñ yolbaşçılığında “Ebediyet” bala horu çıqışta bulundı. Bundan da ğayrı, Qırım Cumhuriyeti ve Sevastopol şeeri musulmanları diniy idaresi tarafından azırlanıp, Noman Çelebicihannıñ ömüri ve faaliyetini añlatqan vesiqalı film kösterildi. Toplaşuvda Qırımtatar medeniy-tarihiy miras müzeyiniñ usulşınası Şefiqa Abduramanova çıqış yaptı.
“Vatanperverlik” degende, ne içündir arbiy vatanperverlik qast etile, ve halq simvolları degil de, devletçilikniñ simvolları köz ögünde tutula. İçtimaiy-iqtisadiy şekillenüv ne qadar yüksek derecede olsa, vatanperverlik de o qadar muvafaqiyetlidir. Çelebicihan vataperverlikke yañı bir şekilni berdi. “Halqımnı ne qadar çoq sevsem, diger halqlarnı o qadar çoq ürmet etem”, – dep aytqan edi. Noman Çelebicihan bütün halqlar içün uquq teñligini istey edi, Qırımda gegemon olmasını istemey edi”, – dedi Şefiqa Abduramanova.
Tedbirde Aqyar cemaatçılığınıñ vekilleri, İçtimaiy alâqalar şübesiniñ temsilcileri, qırımtatar faalleri, talebeler ve yerli sakinler iştirak ettiler. Tantanalı toplaşuvdan soñ iştirakçiler Noman Çelebicihannıñ, anarhist matroslar tarafından öldürilmeden evel, soñki künlerini keçirgen Aqyardaki evelleri apishane olğan bina üstündeki hatıra tahtası yanına güldestelerni qoydılar.
Noman Çelebicihan (1885-1918) – qırımtatar yazıcısı, qırımtatar milliy gimn sözleriniñ müellifi, din, cemaat ve siyaset erbabı. 1917-1918 ss., o, qırımtatar halqını ğayrıdan tiklenmesiniñ timsali olğan Birinci qırımtatar Qurultayınıñ temellerini qoyğan insanlardan biri edi.
QMDİ matbuat hızmeti
