Qırım Müftisi hacı Emirali Ablayev Qırım Cumhuriyetiniñ başlığı Sergey Aksönov ile birlikte Cemaat ekspert şurasınıñ çıqış oturuşında iştirak etti. Mezkür şura Bağçasaraydaki federal seviyede medeniy miras obyekti olğan “Hanlar sarayı XVI-XIX as.” külliyesinde” keçirile turğan tamir ve restavratsiya işlerine cemaatnıñ nezareti, onı monitoringi, çıqqan meselelerde mesleat etmesi fuktsiyasını yerine ketire.
Çıqış tedbiri devamında Qırım musulmanlarınıñ diniy yetekçisi Hanlar sarayında keçirilgen restavratsiya işlerinen, hususan, bu yılnıñ fevral ayında divarı çatlağan “Graf binasını” baqıp çıqtı.Bundan da ğayrı, hacı Emirali Ablayev Büyük Han camisi minareleriniñ yanğınğa qarşı tamir işleriniñ keçirilüvini muzakere etti.Çıqış muşavereniñ iştirakçileri Hanlar sarayı mezarlığını ziyaret ettiler, arheologik araştırmalarınıñ keçirilüvi boyunca perspektivanı ve yaqın devirge bücetniñ teşkil etilüvi meselelerini muzakere ettiler.
“Hansaray – müim medeniy tarihiy miras obyektidir. O, tek qırımtatarlar içün degil de, bütün Qırım ve Rusiye Federetsiyasınıñ sakinleri içün müimdir. Bizim boyun borcumız şu obyektni kelecek nesiller içün saqlamaqtır”, – qayd etti Qırım musulmanlarınıñ diniy yetekçisi.
Qayd etmeli ki, Bağçasaraydaki Hanlar sarayı obyektleriniñ tamirlenmesini 2023 senesiniñ noyabr ayında yekünlemege planlaştırıla.
Bundan da ğayrı, Qırım Müftisi hacı Emirali Ablayev Qırım Cumhuriyetiniñ başlığı Sergey Aksönov ile birlikte Zıncırlı medresesini ziyaret etip, onıñ inkişafı kontseptsiyasını taqdim etti. Külliye saasında arheologiya müzeyi ve diniy-maarif merkeziniñ açılması planlaştırıla.
Qırım MDİ matbuat hızmeti
Qırım Cumhuriyeti başlığınıñ malümat idaresi ve matbuat hızmetiniñ fotoresimleri