2020 sene, oktâbr 29 künü Bulğar şeerinde “Rusiye musulmanlarınıñ diniy mirası” serlevhalı II halqara forum çersivesinde “Rusiyede ve ondan tış musulman yaşlarınıñ vatandaşlıq kimliginiñ şekillenmesi” adlı II studentlik ilmiy-ameliy konferentsiya olıp keçti.
Tedbirde 100 ziyade vekil iştirak etti, şu cümleden, 30-dan ziyadesi uzaqtan interaktiv şekilde qoşuldı. Vekiller arasında Rusiye ve çetel aliy oquv yurtlarınıñ talebeleri, ocaları ve hadimleri mevcut ediler. Olar aşağıdaki aliy oquv yurtlarını temsil ete ediler: Bulğar İslâm akademiyası, Rusiye İslâm institutı, Dağıstan gumanitar institutı, Başqır devlet institutı, Qazan federal universiteti, A.İ. Gertsen adına Rusiye devlet pedagogik universiteti, Tümen devlet universiteti, Termez devlet universiteti (Özbekistan), Sunja şeerindeki İslâm institutı (İnguşetiya Cumhuriyeti), M. Aqmulla adına Başqır devlet universiteti, Novosibirsk devlet iqtisadiyat ve idare universiteti, Moskva gumanitar universiteti, Lomonosov adına Movkva devlet universiteti, Sankt-Peterburg devlet universiteti, V.İ. Vernadskiy adına Qırım federal universiteti, El-Nahrayn universiteti (İraq), El-Karavin universiteti (Marokko), II Hasan universiteti (Marokko), Halqara İslâm akademiyası (Özbekistan), bundan da ğayrı, Moskva ilâhiyat ve uquq islâmiy kölleci.
Konferentsiyanıñ esas maqsadı – zemaneviy dünyada musulman yaşlarınıñ ananeleri, yañı usullar ve gençlerniñ problemalarını çezüv leyhaları ile alâqalı meselelerni muzakere etüv oldı.
Sektsiyalarda yaşlarnıñ kimligini pekitüv, zemaneviy Rusiye cemiyeti şartlarında vatanperverlikni terbiye etüv ve tolerant şuurnıñ şekillenüvi kibi meseleler muzakere etildi.
Bugün dört sektsiya olıp keçti: “Zemaneviy dünyada musulman yaşları: ananeler, innovatsiyalar ve leyha çezimleri”; “Devlet siyasetiniñ esas yönelişi olaraq yaşlarnıñ vatandaşlıq kimliginiñ pekitilüvi”, “Studentler ve yaşlarda vatandaşlıq kimliginiñşekillenmesindeki bir amil olaraq içtimaiy faaliyet ve göñülli hızmet”; “Tahsil saasında dinlerara dialog: vatandaşlıq kimligi pekitilüviniñ potentsialı”.
QMDİ matbuat hızmeti