Kebir caminiñ imamı İsmail Ablayev “Yaşlar – terrorizmge qarşı!” tedbirinde iştirak etti. Tedbir Aqmescit ve Qırım yeparhiyasınıñ “Zörna” (“Urluqlar”) ortodoks yaşlar maarif merkezinde olıp keçti ve Terrorizmnen küreş ile hemdemlik kününe bağışlandı. İsmail Ablayev öz çıqışında qayd etti ki, diniy ekstremizm – eñ qorqunç vaqialardan biridir. “Er türlü qorquzuv, zorbalıq, masumlarnı öldürüv bütün dinlerde yasaq etilgen. Bütün dinlerniñ terrorizmnen iç bir alâqası yoq. Diger dinler kibi, İslâm afu etmek, sevmek ve ürmet etmekni ögrete. Epimizni Allah yarattı ve bütün dinler ilk evelâ Allahnı sevmege ögrete. Eger biz Allahnı sevsek, demek, bir-birimizni de sevmek kerekmiz, çünki epimiz Allah tarafından yaratıldıq”, – dedi Qırım Müftiliginiñ hadimi.
Bundan da ğayrı, tedbir devamında iştirakçiler ögünde Qırım Cumhuriyeti Milletlerara munasebetler boyunca devlet komitetiniñ milletlerara munasebetler ve migrantalarnıñ içtimaiy-medeniy adaptatsiyası boyunca idaresiniñ rehberi Dilâver Osmanov, Aqmescit ve Qırım yeparhiyasınıñ yaşlar işleri bölüginiñ rehberi papaz Yevgeniy (Polütov), Aqmescit şeeri memuriyetiniñ içki siyaset idaresiniñ dinler işleri sektorınıñ rehberi Vladimir Datsko ve Aqmescit şeer memuriyeti başlığınıñ yanında çalışqan Dinlerara munasebetler boyunca şuranıñ yaşlır taqımınıñ azası, Yedinci kün adventistler hristian kilise yerli diniy teşkilâtınıñ pastorı İvan Malaşihin çıqışta bulundılar.
Qırım MDİ matbuat hızmeti