Azov (Qalay) İslâm ilimleri medresesiniñ qadınlar bölüginde mezunlar bayramı olıp keçti. Mezunlarnı hayırlamaq içün bayramğa studentlerniñ soy-sopları ve yaqınları keldi. Olarnıñ episi diplomlarnı alıp, kendi regionında İslâm dininden ders berecektir. Tedbir çerçivesinde yılnıñ neticeleri çıqarıldı, mezunlar öz bilgi ve becerikliklerini kösterdiler. Mezunlarnı Azov medresesiniñ başı Emir-Asan Ümerov hayırladı.
O, bilgi insan şekillenmesinde pek müim olğanını qayd etti ki. “Diniy tasil pek müimdir, çünki maneviy tasil – milletimiz ve Qırımnıñ sağlam, ahlâqiy kelecegidir. Bu milletimiz içün pek müim bir vaqia, çünki yarımadada daa 12 diniy tasil ocağı açıldı”, – dep ayttı Emir-Asan Ümerov.
Tedbir çerçivesinde naşid ve ilâhiler yañğıradı, mezunlar şiirler oqudılar, bayram iştirakçileri ögünde kontsert programmını kösterdiler.
Adet üzre, er bir mezun bilgi tacını aldı, demek, medrese mezunı alğan bilgilerine köre yaşap, olarnı darqatmaq kerek olğanını temsil ete. Tedbirde ana-baba ve ocalar çıqışta bulunıp, ögütler berdiler, studentler ise öz sağlıqlaşuv sözlerini ayttılar.
QMDİ matbuat hızmeti
