Moskva şeerinde keçirilgen işbu forumda Qırım müsulmanları Diniy İdaresiniñ adından Qırım Müftisiniñ muavini Esadullah Bairov ve Müftiniñ Mesül Kâtibi Ayder Acimambetov iştirak etti. RF müsulmanları Diniy İdaresini ve Rusiye Müftileri Keñeşini RF MDİ reisiniñ birinci muavini, Moskva islâm institutınıñ rektorı Damir Mühetdinov temsil etti.
RF Prezidentiniñ iç siyaset İdaresi Memurligi yolbaşçısınıñ muavini Mihail Belousovnıñ idareciligi astında keçirilgen muşaverede, Rusiyeniñ merkeziy diniy teşkilâtlarınıñ ve islâm aliy oquv yurtlarınıñ rektorları da iştirak etti.
Tedbirniñ devamında, devletteki müsulman ümmeti inkişafınıñ müim meseleleri, bu cümleden, bölgelerde din erbaplarınıñ, yaş mütehassıslarnıñ azırlanuvı ve olarğa destek kösterüvi kibi meseleler de muzakere etildi. Bundan ğayrı, islâm tasil standart programmasına, islâm oquv yurtı talebeleriniñ ve mezunlarınıñ iş tapuvı, maddiy siltem kibi destek, imamlarnıñ ve medrese ocalarınıñ attestatsiyası ve ğayrıdan keçirilgen attestatsiyası meseleleri, diniy tasilniñ aluvı aqqındaki çetel diplomlarınıñ tasdiqlav tertibi, çetel aliy oquv yurtlarınıñ mezunları içün mahsus kurslarnıñ işlep çıqaruvını, RF grajdanlarınıñ çetel islâm oquv yurtlarında tasil almaq hususında malümat taqdim etmek kibi mevzular da aydınlatıldı.İştirakçilerniñ firince, diniy teşkilâtlarnıñ ve müsulman aliy oquv yurtlarınıñ inkişafı meselesinde devletniñ teşebbüsi – müsulman din erbapları yaş nesiliniñ terbiyelüvine qoşqan müim bir issedir.
Qayd etmeli ki, Fond, Rusiye müsulmanları arasında bilgi seviyesiniñ artması, farqlı ideologiyanıñ ve yat olğan degerliklerniñ aşlaması, terrorizm ve ekstremizmge qarşılıq maqsadınen keçirilgen, içtimaiy ceetten müim olğan tedbirlerniñ keçirilüvinde merkez yerini tuta.
QMDİ MDT (DUM.RF malümatlarına esaslanıp)