Aqmescitte Qırım musulmanları diniy idaresiniñ hanım ocaları içün ihtisas yükseltüvi kursu başlandı. Dersler Seit Settar külliyesinde keçirile.
Eki künlük kurs programmasında diniy mevzular, hususan, İslâm aqaidi mevcuttır. Derslerni fıqıh magistri, Müfti muavini Ayder İsmailov, Müfti muavini Esadullah Bairov, ilâhiyatçı ve ruhiyatçı, Müftiyatnıñ “Faydalı ilim” diniy maarif leyhasınıñ rehberi Zeyneb Bairova ve halq ögünde açıq çıqışlar boyunca davetli lektor Zenife Seitmamut keçireler.
“Faydalı ilim” diniy-maarif leyhasınıñ rehberi Zeyneb Bairova qayd etkenine köre, din ocaları daima bilgi almaq ve olğan bilgilerini mükemmelleştirmek kerek, ihtisas yükseltüvi kursları ise, bunıñ içün güzel çaredir.
“İhtisas yükseltilüvi kurslarından keçken insannıñ mütehassıs olaraq qıymeti öse, – o, tek yañılıqlar aqqında haberdar olmaqtan ğayrı, özü de işbu yañılıqlarnı kirsete ve olarnı işinde qullana bile. Belli olğanı kibi, biz er yıl İslâm temelleri ocaları arasında eñ güzel metodik qullanma boyunca yarışnı keçiremiz, şu metodik qullanmalarnı Qırımdan tış, Moskvada, Qazanda ve Mordoviyada çalışqan ocalar qullana. Bu ise, Qırım musulmanları diniy idaresi ocalarınıñ yüksek professional derecesiniñ köstergiçidir”, – dedi Zeyneb Bairova.
İhtisas yükseltüvi kursunda 50 ziyade İslâm temelleri boyunca hanım oca keçmekte.
Al-ı azırda cumhuriyetniñ regionlarında İslâm temelleri derslerini 80 hanım oca bere.
Qırım MDİ matbuat hızmeti
