İslâm-Terek rayonınıñ Vladislavovka köyünde musulmanlar içün ibadethane açıldı. Tedbirde QMDİ diniy teşkilâtlar ile alâqa bölüginiñ reberi Raim Ğafarov iştirak etti. O, Qırım Müftisi hacı Emirali Ablayev adından yerli sakinlerni hayırlap, bahşiş olaraq muqaddes Quran kitabını ediye etti. Yañı ibadethanede cemaat namazı, musulman cemiyeti ve yerli sakinler ile subet ötkerildi.İbadethane yerli musulman sakinleriniñ sadaqa paralarına qurulğan edi. Qurucılıq işleri bir yarım yıl devam etti. İleride ise minareniñ qurulması ve ibadethane civarındaki topraqlarnıñ abadanlıştırıluvı planlaştırıla.
Raim Ğafarovnıñ sözlerine köre, qurucılıqta Türkiyede yaşağan qırımtatarlar da destek kösterdiler.
“İbadethaneniñ açıluvına vetandaşlarımız bahşişlarnı – namazlıqlar, tabut içün örtülerni yolladılar. Bundan da ğayrı, minareniñ qurulmasında yardım etmege niyetindeler”, – dep qayd etti Raim Ğafarov.
Vladislavovka köyünde 200 yaqın qırımtatar qorantası yaşay.
QMDİ MDT matbuat hızmeti
