İslâm Terek rayonınıñ Çelebi Eli (Lgovskoye) köyünde tantanalı müitte cami açıldı. Merasimde Qırım Cumhuriyeti ve Sevastopol şeeri Müftisi hacı Emirali Ablayev iştirak etti.
Müfti efendi caminiñ qurulışında faal iştirak etken er keske teşekkür bildirdi.
“Bugün biz tarihiy vaqia, biz yañı cami açıluvınıñ şaatlarımız. Bugün amanlıq içinde olğan Qırımımızda böyle merasimlerde iştirak etmek imkânımız içün Allahqa şükür etemiz. Bu amanlıqnıñ er vaqıt olması içün oña qıymet bermek ve Yüce Rabbimizge dua etmek kerekmiz ki, onı bir kimse bozamasın. Ebet, devletimizniñ, Cumhuriyetimizniñ rehberlerine halqlarımıznıñ ananeviy qıymetleriniñ saqlanıluvı içün yapqanları munasebetinen teşekkür bildirmege isteyim”, – dep, qayd etti Qırım Müftisi.
Cami iş adamı ve imam Üsein Arabacı masraflarınen, onıñ satıp alıp ayırğanı topraqta quruldı. Bundan da ğayrı, caminiñ quruluşında yerli cemaat da iştirak etti. Cami 100-den ziyade kişi içün qararlaştırılğan. Üsein Arabacınıñ sözüne köre, yañı cami yerli yaşlarnı ve yaqında yerleşken köylerniñ cemaatını birleştirdi.
Qırım MDİ matbuat hızmeti