Qırımtatar medeniy-tarihiy miras müzeyinde “XIX – XX asırlarda qırımtatarlarnıñ tarihı, medeniyeti ve sanatı ögrenilüviniñ problemaları ve perspektivaları” mevzusında ilmiy-ameliy konferentsiya olıp keçti. Tedbir belli cemaat, siyaset ve edebiyat erbabı, Qırım, Lehistan, Litvaniya ve Aqrusiye musulmanlarınıñ müftisi Noman Çelebicihannıñ 135-yıllığına bağışlandı.
Konferentsiyanıñ başında Qırım Cumhuriyeti ve Sevastopol şeeri musulmanları diniy idaresiniñ temsilcisi Emir-Asan Ümerov Qırım Müftisi hacı Emirali Ablayev adından konferentsiya iştirakçilerini selâmlap, eyi çalışmalar tiledi ve Noman Çelebicihannıñ ruhuna dua oqudı.
Konferentsiya çerçivesinde Emir-Asan Ümerov “İslâmda ifta müessisesi” maruzasınen çıqışta bulunıp, Muhammed Peyğamberden (s.a.s.) başlap, Noman Çelebicihannıñ zamanına qadar müftilik müessisesiniñ inkişafı aqqında tarif etti.
“Şübesiz, bazı deñişmeler olıp keçti, al-ı azırda Müftilik aynı vaqıtta em memuriy, em ifta funktsiyalarını becere”, – dedi Emir-Asan Ümerov.
Maruzanen müzey tarafından neşir etilecek konferentsiya malümatları cıyıntığında tanış olmağa mümkün olur.
QMDİ matbuat hızmeti
