Aqmescit şeerinde Seit Settar cami külliyesiniñ konferentsiya zalında Qırım halqlarınıñ sürgün etilüvi qurbanlarını añma kününe bağışlanıp, “Kelecek içün keçmişnen suhbet” serlevha astında tögerek masanıñ oturuşı olıp keçti. Tedbirniñ teşkilâtçıları – Qırım Cumhuriyeti ve Sevastopol şeeri musulmanları diniy idaresi (Tavriya Müftiligi) ile Qırım Cumhuriyeti Başlığı yanındaki Qırımtatarlar şurasıdır.
Tögerek massa tedbirini Qırım musulmanlarınıñ diniy yetekçisi hacı Emirali Ablayev açtı. Öz çıqışında Qırım Müftisi qayd etti ki, qırımtatar halqınıñ büyük tarihı bar ve, o, em quvançlı, em de kederli saifelerden ibaret. “Biz bir-birimizge destek olıp yaşamalımız. Bizim örnek almamız içün eki yöneliş bar: bu – İslâmnı qabul etüvimizniñ 1 000 yıllığı ve, ekincisi, Rusiyede yaşav tarihımıznıñ 240 yıllığıdır. İşbu tarihlardan bilgi almalımız, müsbet tecribesini elde etmek kerekmiz. Aqılımızda tutayıq ki, Vatan – er şeyden evel kele. Elbette, er yerde yaşay bilesiñ, lâkin, Vatan – tamırlarıñ olğan yerdir”, – dep, qayd etti hacı Emirali Ablayev.
Tedbirde Zenife Ablayeva ve Gülnara İlyasovanıñ “Qalpte iman ile” kitabına esaslanıp çıqarılğan vesiqalı film numayış etildi.
Tögerek masa devamında Milletlerara munasebetler boyunca devlet komitetiniñ başlığı, QC başlığı yanındaki Qırımtatarlar şurasınıñ azası Ayder Tippa; filologiya ilimleri doktorı, V. İ. Vernadskiy adına QFU Filologiya institutındaki qırımtatar filologiyası kafedrasınıñ professorı, QC başlığı yanındaki Qırımtatarlar Şurasınıñ kâtibi Lemara Selendili; Fevzi Yaqubov adına Qırım müendislik ve pedagogika universitetiniñ içtimaiy-gumanitar fenler bölüginiñ rehberi, içtimaiyat ilimleri doktorı, dotsent, QC başlığı yanındaki Qırımtatarlar şurasınıñ azası Refiq Qurtseitov; “Qırımtatarlarnıñ “İnkişaf” cemiyeti” regional cemaat teşkilâtınıñ başlığı Eskender Bilâlov maruzalarınen çıqışta bulundılar.
1944 senesiniñ mayıs 18 künü dünya tarihında büyük facia olaraq añılacaq. Şu künde qırımtatarlar zorbalıqnen Qırımdan sürgün etildi. Bu facianıñ çoq ağır neticelerine baqmadan, qırımtatar halqı yat ellerde Vatanğa qaytmaq arzusınen yaşağan.
Tarihiy adaletni yerine ketirmek ve sürgünlikniñ qanunsız neticelerini lâğu etmek maqsadınen Rusiye Federatsiyasınıñ Prezidenti Vladimir Putin 2014 senesi, apel 21 künü “Ermeni, bulğar, yunan, italyan, qırımtatar ve alman halqlarınıñ reabilitatsiya tedbirleri ve olarnıñ ğayrıdan tiklenüvi ve inkişafı içün devlet destegi aqqında” fermanını imzaladı.
Sürgünlik mevzusı keçmiş ile künümiz ve kelecek zaman arasındaki bağnı er daim tiri tutacaq.
Qırım MDİ matbuat hızmeti