Qırım Cumhuriyeti ve Sevastopol şeeri Müftisi hacı Emirali Ablayev Kiyev-Peçersk lavrası etrafındaki vaziyetni izaat eterek, bu areketler devlet tarafından yapılğan basqın olğanını bildirdi.
“Ukraina akimiyetiniñ din meselesinde saylağan yolu uçurumğa alıp kete. Dinni qullanmaq, onıñ üstünden külmek, insanlarnı öz adamlar ve yatlarğa bölmek – halqqa qarşı bir cinayettir. Bugün Kiyevde Kiyev-Peçersk lavrası etrafındaki vaziyetke devlet basqını aytmaq mümkündir. Medeniy dünyada millionlarca mensübi olğan ananeviy dinge qarşı böyle areketler yapılmaz. Tek tamırlarından, dininden ve urf-adetinden uzaq olğan kişiler özüni böyle alıp bara bile”, – dep, qayd etti Müfti.
Bundan da ğayrı, onıñ qayd etkenine köre: “Böyle areketlernen akimiyet Tañrıdan ve inançlı insanlardan uzaqlaşa, bu ise, mutlaq keri qaytarılışı mümkün olmağan neticelerge ketirecek”.
Hacı Emirali Ablayev Ukraina akimiyetiniñ mezkür diniy obyekt meselesinde yapqanlarını taqbih ete.
“Biz, diniy obyektlerimizniñ ve binalarımıznıñ işğal etilüvine oğaran Qırım musulmanları olaraq, inançlı kişilerniñ duyğuları ıncıtılmasını, vicdan ve din serbestligi saasında aq-ukuqnıñ bozulmasını qatiyen taqbih etemiz. Dinge qarşı yapılğan böyle provokatsiyalar iç bir vaqıt yahşı neticeler ketirmegen ve ketirmeycek de. Ukraina akimiyeti bu aqiqatnı yahşı añlap, bilmek kerekler ki, erte ya da keç biz epimiz Allahqa qaytacaqmız”, – dep, bildirdi Qırım ve Sevastopol Müftisi.
Qırım MDİ matbuat hızmeti