Qırımda “Merhametlik lâlesi” hayriye aktsiyası başlandı. Bu sene QC başlığı Sergey Aksönovnıñ destegi ile aktsiyanı bütün Qırım seviyesinde keçirmek qararı alındı. Aktsiyada Qırım Cumhuriyetiniñ umumtahsil müessiseleri iştirak etecek.
Aktsiyada iştirak etmek içün hayriyege öz issesini qoşmaq istegen er kes davet etile – mektep talebeleri, bala bağçalarındaki balalar, şeer ve rayon memuriyetleri, medeniyet erbapları, imamlar, din cemiyetleriniñ başlıqları, cemaat faaliyetçileri.
“Merhametlik lâlesi” aktsiyasınıñ rehberi Zenife Ablayevanıñ bildirgenine köre, aktsiya neticesinde toplanılğan paralarnıñ ekseriyeti Kefede bala hospisiniñ qurucılığına ayırılacaq.
“Biz er sene mezkür hayriye aktsiyasını keçiremiz ve yıl-yıldan iştirak etmege tırışqan, öz ellerinen lâlelerni yapmağa istegen balalarnıñ ve ocalarnıñ sayısı ep artqanını köremiz. Şu sebepten, umumtahsil müessiseleriniñ episi iştirak etsin ve yardım alacaq balalarnıñ sayısı da çoqlaşsın diye, bu yıl aktsiyanı bütün Qırım boyunca keçirmek maqsadını qoydıq”, – dedi Zenife Ablayeva.
Aktsiya “Balalarnıñ ellerinen ve büyüklerniñ eyi niyetinen” şiarı astında fevral-mart ayları devamında keçirilecek. Şu müddet içinde er bir göñülli aktsiyanıñ timsallerini azırlap qoyacaq, martta ise, balalar yapqan elyapmalar farqlı meydançıqlarda satılıp, hayriye içün qullanılacaq.
Qırım MDİ matbuat hızmeti