Qırım Cumhuriyeti ve Sevastopol şeeri musulmanları diniy idaresinde “Merhametlik lâlesi” aktsiyasınıñ neticeleri çıqarıldı. “Balalarnıñ ellerinen ve büyüklerniñ eyi niyetinen yapılğan merhametlik” şiarı astında ötkerilgen aktsiya 2020 senesi dekabr 10-26 künleri keçirildi. Tedbirde iştirak etmek içün Aqmescit şeer mektepleriniñ talebeleri davet etildi, olar aktsiyanıñ timsali olğan lâleni öz ellerinen yaptılar, bundan soñ el işi lâleler satışqa çıqarıldı. Umumen, bir yarım biñ lâle yapıldı. Lâleler Aqmescitniñ memuriy müessiselerinde, “Aşan”, “Tsentrum” kibi ticariy merkezlerde satıldı. Eki aftalıq hayriye aktsiyasında 120 biñ ruble toplanıldı.
Toplanğan paralar ağır hasta balalarnıñ tedaviylenüvine yollanılacaq.
Qırım Cumhuriyeti ve Sevastopol şeeri musulmanları diniy idaresi aktsiyanıñ teşkil etilüvinde ve keçirilüvinde yardım etken Aqmescit şeer memuriyetiniñ başlığı Yelena Protsenkoğa, Aqmescit şeeri tahsil ve medeniyet hadimlerine, Aqmescit rayon memuriyetiniñ başlığı Dionis Aleksanov ile muavini Ruslan Yakubovğa, V.İ. Vernadskiy adına Qırım federal universitetiniñ rektorı Andrey Falaleyev ve onıñ yardımcısı Ervin Musayevge, ressamlar Ayşe Dere, Elzara Seydametova, Madina Abdullayevağa, destek köstergen göñülliler taqımına ve aktsiyada iştirak etken er kesge teşekkürini bildire.
QMDİ matbuat hızmeti