Qırım Cumhuriyeti ve Sevastopol şeeri musulmanları diniy idaresiniñ neşriyat bölüginiñ başlığı Emir-Asan Ümerov 2021 senesi İsmail Gasprinskiy adına Mediamerkez tarafından neşir etilgen kitaplarnıñ prezentatsiyasında iştirak etti. Tedbir Qırım Cumhuriyetiniñ milletlerara munasebetler boyunca devlet komitetiniñ konferents-zalında olıp keçti. “Ana tilinde yazğan şair ve yazıcılarğa devletniñ qol tutqanı ğayet quvandıra, çünki bu milliy edebiyatlarnıñ saqlanıluvı içün müim bir adımdır”, – dep, öz teessüratlarınen paylaştı Emir-Asan Ümerov.
Tedbirde Qırım Cumhuriyetiniñ Devlet Şurası Başlığınıñ muavini Edip Ğafarov, Milletlerara munasebetler boyunca devlet komitetiniñ başlığı Ayder Tippa ve onıñ birinci muavini Ruslan Yaqubov, Qırım Cumhuriyeti Devlet Şurası yanındaki Halq diplomatiyası ve milletlerara munasebetler boyunca komitetniñ başlığı muavini İvan Şonus, kitaplarnıñ müellifleri ve tertip eticileri, cemaat faaliyetçileri iştirak ettiler. Tedbir iştirakçileriniñ diqqatına nevbetteki neşirler taqdim etildi: “Katalog-albom: Ahtem Aliyev – hudojnik i poet” (“Katalog-albom: Ahtem Aliyev – ressam ve şair”; müellifi A. Aliyev); “Neobıçnıye öbitateli Krıma” (“Qırımnıñ acayıp sakinleri”; müellifi V. Ölhovskaya); “Tılsımlı masallar” (müellifi R. Suleymanov); “Ya ne bıl göstem na zemle…” (“Men dünyada musafir degil edim…”; müellifi V. Basırov); “Yu. Osmanov. Çelovek iz drugogo izmereniya” (“Yu. Osmanov. Diger boyut insanı”; müellifi A. Dobro).
Qırım MDİ matbuat hızmeti