Qırım Cumhuriyeti ve Sevastopol şeeri musulmanları diniy idaresine dostane ziyareti ile Aqmescit ve Qırım mitropoliti Tihon teşrif etti.
Qırım Müftisi hacı Emirali Ablayev ile birlikte işbirlikni ve umumiy leyhalarnıñ ömürge keçirilüvini muzakere ettiler. Körüşüv çerçivesinde diniy yetekçiler din erbaplarınıñ Qırım Cumhuriyetindeki diniy uyumlılıqqa qoşqan salmaqlı isselerini ayrıca qayd ettiler.
Qırım Müftisi urğulap ayttı ki, soñki 25 yıl içinde Qırım Yeparhiyası ve Müftilik arasında dostane eyi munasebetler quruldı ve tiledi ki, bu munasebetler daa da güzelleşsin.
“Biz er kün umumiy Vatanımız Qırımda olğan barışıqlıq ve birdemlik içün Allahqa şükür etemiz. Biz de, öz nevbetimizde, dostane ve samimiy munasebetimizni saqlamaq içün elimizden kelgenini yapmağa devam etecekmiz”, – dedi Müfti efendi.
Hacı Emirali Ablayev ve Mitropolit Tihon bir-birine sağlıq ve birlikte semereli çalışmalar tilediler.
Qırım MDİ matbuat hızmeti