Moskvada Poklonnaya dağında yerleşken Memorial camide “Ramazan çadırı” er yıllıq leyhası çerçivesinde Qırım Cumhuriyeti ve Sevastopol şeeri musulmanları diniy idaresinden “Qırım Müftisiniñ iftarı – qırımtatarlarnıñ aqşamı” olıp keçti.
Musafirler ögünde selâmlav sözlerinen Qırım Müftisi hacı Emirali Ablayev adından Müfti muavini Raim Ğafarov çıqışta bulundı. O, er kesni Ramazan ayınen hayırladı ve Allah orazalarımıznı ve dualarımıznı qabul etmesini tiledi.
“Bu sene Ramazan çadırınıñ baş mevzusı – qorantadır. Biz epimiz bir büyük qorantamız. Böyle merasimler birleşmemiz, dostluqta, birdemlik içinde yaşamamız, Yüce Allahqa işanıp tayanaraq, barışıqlıq içün dua etmemiz sebebinen keçirile”, – dep, qayd etti Raim Ğafarov.
Buña ilâve olaraq, Qırım musulmanlarına ve kelgen musafirlerge eyi tilekler ile Rusiye Federatsiyası Prezidenti yanında Qırım Cumhuriyetiniñ daimiy temsilcisiniñ birinci muavini Mihail Solomentsev ve RF Prezidenti Memuriyetiniñ diniy teşkilâtlar ile işbirlik bölüginiñ Mesleatçısı Yuliya Güseva sözge çıqtılar.
“Alem-i nisvan” islâmiy medeniy-maarif qadınlar merkeziniñ rehberi, QMDİ MDT diniy tedbirlerni teşkil etüv bölüginiñ başlığı Zenife Ablayeva merkezniñ faaliyeti aqqında tarif etti.
Çadırnıñ musafirleri içün medeniy programma azırlanıldı – musafirlerge maarif levhaları, Qırım Müftiliginiñ faaliyeti aqqında videolevhalar taqdim etildi, diniy hadimler çıqışta bulundılar, viktorina keçirildi, balalar ilâhiylerni icra ettiler.
Davet etilgen musafirler arasında diniy hadimler, Moskvadaki qırımtatarlar cemiyetiniñ azaları, milliy-medeniy teşkilâtlarnıñ vekilleri bulundı. Ürmetli musafirlerge Qırım Müftiligi adından hatıralıq bahşışlar – ulu maarifçi İsmail Gasprinskiyniñ resimi ile kümüş paralar taqdim etildi.
Tedbir videosınıñ tolu versiyasını aşağıda seyir etmek mümkün.
Ramazan çadırı RF MDİ terkibindeki Moskva musulmanları diniy idaresiniñ er yıllıq hayriye medeniy-maarif leyhasıdır, tedbir Moskva akimiyetiniñ destegi ile keçirile. Er künlük iftarlar esnasında çadırnıñ musafirleri farqlı musulman halqlarınıñ medeniyetleri ve ananelerinen tanış olalar.
Qırım MDİ matbuat hızmeti