İyunniñ 22-sinde, cumaaqşamı künü, Aqmescitte hatıra ve qaar Kününe bağışlanğan tedbirler olıp keçti. Yu. Gagarin adına parkta belgisiz sayılğan arbiyniñ mezarlığı yanında Qırım akimiyetiniñ vekilleri, nazirliklerniñ hadimleri, veteranlar, mektep talebeleri, teşkilâtlar ve siyasiy birleşmelerniñ azaları, FVN (MÇS), İİN (MVD) hadimleri toplaştı.
Tedbirde Aqmescit rayonınıñ imamı Raim Ğafarov iştirak etti. O, Qırım Müftisi hacı Emirali Ablayev adından kelgenlerni selâmladı ve dua oqudı.
“Bugün epimiz içün qaar künü. 77 yıl evelsi sovet şeer ve köylerine bombalar atıldı, adiy insanlar can berdiler. Bu deşetli künler edi. Amma bizim halqımız dayandı ve ğalip çıqtı. Ölüm ve qayğı yollarından keçip, ğalebeni qazandı. Bugünki kün ise hatıramızda barışıqnıñ qadiri aqqında bir hatırlatma kibi qalacaq. Cenk – insannıñ ömürinde eñ deşetli şeylerden biridir. Ve biz evimizge cenk kelmesin, dep qollarımızdan kelgenini yapmalımız”, – dep ayttı Raim Ğafarov.
Bundan soñ iştirakçiler memorialğa çeçekler qoyıp, Ulu Vetan cenkinde elâk olğanlarnı sükünet daqqası ile añdılar.
QMDİ matbuat hızmeti
